ମନରେ ବିଶ୍ୱାସ ଥିଲେ କଣ ବା ଅସମ୍ଭବ କହିଲେ । ପରିସ୍ଥିତି ଯେତେ ବି ପ୍ରତିକୂଳ ହେଉନା କାହିିଁକି, ଯଦି ଆପଣ ହାର ମାନି ନାହାନ୍ତି ତାହେଲେ ସଫଳତା ନିଶ୍ଚୟ ଆପଣଙ୍କ ପାଦ ଛୁଇଁବ । ଏହାର ଏକ ଜ୍ୱଳନ୍ତ ଉଦାହରଣ ହେଲେ କୁନି ଦେହୁରୀ । ଖୁବ୍ କମ୍ ବୟସରୁ ନିଜ ବାପାଙ୍କୁ ହରେଇଲେ ସତ କିନ୍ତୁ ହାରିବାକୁ ଦେଲେନି ବାପାଙ୍କ ସ୍ୱପ୍ନକୁ, ଜଣେ ସଫଳ ଟସର ଚାସୀ ହେବାର ସ୍ୱପ୍ନକୁ ପୁରଣ କଲେସେ, ପୁଣି ନିଜ ସହ ୫୦୦ ରୁ ଅଧିକ ମହିଳାଙ୍କ ପାଇଁ ଖୋଲିଦେଲେ ରୋଜଗାରର ବାଟ । ଟସର ଶିଳ୍ପରେ ଯୋଗଦାନ ପାଇଁ ତାଙ୍କୁ ମିଳିଛି ରାଷ୍ଟ୍ରପତି ପୁରସ୍କାର ସହ ରାଜ୍ୟ ସରକାରଙ୍କ ପୁରସ୍କାର ।
ପୁରା ନା ତାଙ୍କର କୁମାରୀ କୁନି ଦେହୁରୀ, କେନ୍ଦୁଝର ଜିଲ୍ଲା ହରିଚନ୍ଦନପୁର ବ୍ଲକ ଖରଡ଼ାପାଳ ଗାଁର ବାସିନ୍ଦା ସେ । କ୍ୟାନସରରେ ପିଡ଼ିତ ବାପାଙ୍କ ଦେହାନ୍ତପରେ ନିଜ ଭଉଣିଘର ବାଘମୁଣ୍ଡାକୁ ଚାଲିଆସିଲେ ସେ । ସେତେବେଳେ ନବମ ଶ୍ରେଣୀରେ ପଢ଼ୁଥିବା କୁନ ିଦେହୁରୀ ବାପାଙ୍କ ସ୍ୱପ୍ନକୁ ପୁରଣ କରିବା ସହ ନିଜ ପରିବାରର ଭରଣପୋଷଣ ପାଇଁ ଟସରକୁ ନିଜ ଜୀବିକା କରିବାକୁ ମନସ୍ଥକଲେ । ସ୍କୁଲ ପାଠପଡ଼ାରେ ଡ଼ୋରି ଲାଗିଲା ସତ କିନ୍ତୁ ୨୦୦୪ରେ ଟସର ବିଷୟରେ ବେଙ୍ଗଲୋର ରେ ୬ ମାସର ତାଲିମ୍ ନେଲେ ଆଉ ଟ୍ରେନିଂରେ ପ୍ରଥମ ସ୍ଥାନ ହାସଲ କରି ଓଡ଼ିଶା ଫେରିଲେ, ଆଉ ସେବେଠାରୁ ପଛକୁ ଫେରି ଚାହିଁନାହାନ୍ତି ସେ ।
ଟ୍ରେନିଂରେ ଶିଖିଥିବା ଉନ୍ନତ ଜ୍ଞାନକୌଷଳକୁ ପ୍ରୟୋଗକରି ଗୁଣାତ୍ମକ ଟସର ଉତ୍ପାଦନରେ ଲାଗିପଡ଼ିଲେ ସେ । କୋକନ୍, ଟସର ରିଲିଂ,ଚରଖା ଆଦି ସାହାଯ୍ୟରେ ସର୍ବୋତ୍ତମ ସିଲ୍କ ଉତ୍ପାଦନ ସହ ବଜାରର ଚାହିଦା ଅନୁସାରେ ବିଭିନ୍ନ ଡ଼ିଜାଇନର କପଡ଼ା,ଶାଢ଼ୀ ଆଦି ପ୍ରସ୍ତୃତିରେ ଲାଗିପଡ଼ିଲେ । ନିଜେ ଆତ୍ମନିର୍ଭର ହେବା ସହ କୁନି ଆଖପାଖ ଅଂଚଳର ମହିଳାକୁ ଟସର ବିୟୟରେ ଟ୍ରେନିଂଦେଲେ ଓ ସେମାନଙ୍କୁ ଦେଖାଇଲେ ରୋଜଗାରର ବାଟ ।
“ଆପଣ ସମସ୍ତଙ୍କୁ ଭଲପାଇବା ଦେଇଚାଲନ୍ତୁ ଦେଖିବେ ଦିନ ଆସିବ ଆପଣଙ୍କୁ ସମସ୍ତେ ଭଲପାଇବେ” ବୋଲି କୁନି କୁହନ୍ତି ।
ହାତରେ ବୁଣା କପଡ଼ା ବିଶେଷକରି ଶାଢ଼ୀର ବଢ଼ୁଥିବା ଚାହିଦାକୁ ଆଖିଆଗରେ ରଖି ଓ କେନ୍ଦ୍ରସରକାରଙ୍କ ମେଡ଼୍ ଇନ୍ ଇଣ୍ଡିଆରେ ସାମିଲ ହେଇ କୁନି ଦେହୁରୀ କେଉଁଝରର ବାଘମୁଣ୍ଡା, ବାରିପଦା ଓ ସମ୍ବଲପୁରରେ ୩ ଗୋଟି ସିଲ୍କ ପାର୍କ ତିଆରି କରିଛନ୍ତି । ନିଜ ପ୍ରଚେଷ୍ଟାରେ ୫୦୦ ରୁ ଅଧିକ ଲୋକଙ୍କୁ କୁଶଳୀ କରିଛନ୍ତି କୁନି,ବିଶେଷକରି ଅନାଥ ପିଲା,ବିଧାବା ସ୍ତ୍ରୀଲୋକ,ଗରିବ ଶ୍ରେଣୀର ଲୋକ ଯେଉଁମାନେ ନିଜ ଜିବୀକା ପାଇଁ ସଙ୍ଘର୍ଷ କରନ୍ତି ଏମାନଙ୍କୁ ରୋଜଗାର ରାସ୍ତା ଦେଖାଇଛନ୍ତି କୁନି ଦେହୁରୀ ।
କୁନି କହନ୍ତି “ଟସର ପୋକକୁ ଦେଖିଲେ ମୋତେ ଭାରି ଖୁସୀଲାଗେ,ସେ ପୋକପାଇଁ ଆଜି ଆମେ ଜୀବିକା ପାଇଚୁ ଭଲ ଦି ପଇସା ରୋଜଗାର କରିପାରୁଛୁ” ।
ନିଜ ଗାଁକୁ ଟସର ଭିଲେଜ୍ରେ ପରିଣତ କରିବାର ସ୍ୱପ୍ନନେଇ ଆଗକୁ ବଢ଼ୁୁଥିବା କୁନିଦେହୁରୀଙ୍କୁ ଆମ ଟିମ୍ ତରଫରୁ ଅନେକ୍ ଅନେକ୍ ଶୁଭେଚ୍ଛା ଓ ଶୁଭକାମନା ।
