ମୌସୁମୀ ଆସିଲେ ତାଙ୍କୁ ଘାରି ଯାଏ ଗଛ ଲଗେଇବା ର ନିଶା । ପ୍ରତିବର୍ଷ ଏଇ ବର୍ଷା ଋତୁରେ ଆସ୍ତରଙ୍ଗର ଆଖପାଖରେ ସେ ଲଗାଇଥାନ୍ତି ପ୍ରାୟ ଏକ ହଜାର ରୁ ଅଧିକ ଗଛ । ଦୁଇ ହଜାର ମସିହାରୁ ଏଇପରି କରି ଆଜି ପର୍ଯ୍ୟନ୍ତ ସେ ଲଗାଇ ସାରିଲେଣି ୩୦,୦୦୦ ରୁ ଅଧିକ ଗଛ। ପୁରୀ ଜିଲ୍ଲା ଆସ୍ତରଙ୍ଗ ବ୍ଲକ ବେଳାଭୂମି ହାଇ ସ୍କୁଲର ସଂସ୍କୃତ ଶିକ୍ଷକ ଭାବେ କାର୍ଯ୍ୟରତ ବିଜୟ କୁମାର ଭଟ୍ଟ ତେଣୁ ଆଖପାଖ ଅଞ୍ଚଳରେ ପାଇଛନ୍ତି ‘ଗଛ ସାର୍’ ର ମାନ୍ୟତା ।
ଖୋର୍ଦ୍ଧା ଜିଲ୍ଲା ଆମ୍ବଡିହ ଗାଁ ନିବାସୀ ବିଜୟ କୁମାର ଭଟ୍ଟ ୧୯୯୯ ମସିହାରେ ଆସ୍ତରଙ୍ଗ ବେଳାଭୂମି ହାଇ ସ୍କୁଲରେ ସଂସ୍କୃତ ଶିକ୍ଷକ ଭାବେ ଯୋଗ ଦେଇଥିଲେ । କିନ୍ତୁ ସେଇ ବର୍ଷ ମହାବାତ୍ୟା ଯୋଗୁ ଓଡିଶା ଉପକୂଳ ଜିଲ୍ଲାରେ ଘଟି ଥିଲା ଭୀଷଣ କ୍ଷୟକ୍ଷତି । ଅସ୍ତରଙ୍ଗ ଥିଲା ଅନ୍ୟତ୍ତମ ସର୍ବାଧିକ କ୍ଷତିଗ୍ରସ୍ତ ଅଞ୍ଚଳ । ମହାବାତ୍ୟା ର ଆଘାତ ରେ ଉପୁଡିଯାଇଥିଲେ ଅସଂଖ୍ୟ ବୃକ୍ଷରାଜି। ବିଶେଷ କରି ଏଇ ଅଞ୍ଚଳର ଶୋଭା ବଢାଉଥିବା ଏବଂ ଉପକୂଳ ଅଞ୍ଚଳକୁ ସୁରକ୍ଷା ପ୍ରଦାନ କରୁଥିବା ତାଳ ଆଉ ନଡିଆ ଗଛର ବଣ ସବୁ ବସ୍ତୁତଃ ଉଜୁଡି ଯାଇଥିଲା । ଏଇ କଥାରେ ଖୁବ ଆଘାତ ପାଇ ଥିଲେ ଗଛ ପ୍ରେମୀ ଭଟ୍ଟ ମାଷ୍ଟ୍ରେ । ପ୍ରକୃତି ଓ ପରିବେଶର ସୁରକ୍ଷା କ୍ଷେତ୍ରରେ ନିଜର ଛୋଟ ଅବଦାନ ଦବାକୁ ସେ ନେଲେ ସଂକଳ୍ପ । ସେବେଠାରୁ ପ୍ରତି ବର୍ଷ ଜୁଲାଇ ଠୁ ସେପ୍ଟେମ୍ବର ଭିତରେ ସେ ତାଳ, ନଡିଆ, ନିମ୍ବ, ଖଜୁରୀ, ବର ଆଦି ଗଛର ଚାରା ସଂଗ୍ରହ କରି ଲୁଣାବନ୍ଧ, ଉପକୂଳବର୍ତୀ ଖାଲି ସ୍ଥାନ, ପଡିଆ ଏବଂ କେନାଲବନ୍ଧ ଆଦିରେ ଲାଗାଇ ଥାନ୍ତି। ଏଇ କାମରେ ତାଙ୍କ ବାର୍ଷିକ ଦରମାର କିଛି ଅଂଶଟିଏ ଖର୍ଚ୍ଚ ହୋଇଥାଏ ।
ଭଟ୍ଟମାଷ୍ଟ୍ରେଙ୍କର ବିଗତ ବାଇଶି ବର୍ଷର ଏଇ ଏକାକୀ ଉଦ୍ୟମର ସୁଫଳ ଏବେ ଦୃଷ୍ଟିଗୋଚର ହେବାରେ ଲାଗିଲାଣି । ଆସ୍ତରଙ୍ଗର ସମୁଦ୍ରକୂଳିଆ କିଛି ଇଲାକାରେ ଏବେ ଆପଣ ଦେଖିବାକୁ ପାଇବେ ତାଙ୍କ ହାତଲଗା ତାଳ, ନଡିଆ ଆଦି ଗଛ ମାନଙ୍କର ପ୍ରାକୃତିକ ସୁରକ୍ଷା ପ୍ରାଚୀର । ଯାହା ଏ ଅଞ୍ଚଳର ମୃତ୍ତିକା ସଂରକ୍ଷଣରେ ଖୁବ ସହାୟକ ହୋଇପାରୁଛି । ସ୍କୁଲ ଛୁଟି ହେବା ପରେ ଏବଂ ସପୂର୍ଣ୍ଣ ଛୁଟି ଦିନ ମାନଙ୍କରେ ବର୍ଷାଋତୁ ସାରା ଭଟ୍ଟ ସାର ଲାଗିଥାନ୍ତି ଜାଗା ଜାଗା ବୁଲି ବୃକ୍ଷ ରୋପଣ କାମରେ। ସାରଙ୍କ କାମରେ ଅନୁପ୍ରାଣିତ ହୋଇ ତାଙ୍କ ଛାତ୍ର ଛାତ୍ରୀମାନେ ମଧ୍ୟ ଏବେ ଏଇ ବାର୍ଷିକ ବୃକ୍ଷରୋପଣ କାମରେ ସହାୟତାର ହାତ ବଢେଇଲେଣି । ସଠିକ ପଦ୍ଧତିରେ ବୃକ୍ଷରୋପଣ କରିବା ପାଇଁ ତାଙ୍କୁ ଅନୁପ୍ରାଣିତ କରିଛନ୍ତି ବନବିଭାଗର ବିଶେଷଜ୍ଞମାନେ । ସେମାନଙ୍କ ଉପଦେଶ ଅନୁସାରେ ପ୍ରତି ଗଛ ଭିତରେ ତିନି ଫୁଟ ବ୍ୟବଧାନ ରଖି ଅଙ୍କାବଙ୍କା ଢାଞ୍ଚା ରେ ସେ ଗଛ ଚାରା ପୋତିଥାନ୍ତି ।
ଗଛମାନଙ୍କୁ ମୁଁ ମୋର ଆପଣାର ମଣିଷଙ୍କ ପରି ଭଲ ପାଏ ଆଉ ଗଛ ଲଗାଇବା ମୋର ସବୁଠାରୁ ପ୍ରିୟ କାମ । ଅବସର ସମୟରେ ଗଛ ଲଗେଇ ପରିବେଶ ସୁରକ୍ଷା ରେ ନିଜର ଯୋଗଦାନ ଦେବାକୁ ମୋର ସବୁ ଛାତ୍ର ଛାତ୍ରୀ ମାନଙ୍କୁ ମୁଁ ସବୁବେଳେ ଅନୁପ୍ରାଣିତ କରିଥାଏ । ମୋ ସାଧ୍ୟମତେ ଆମ ଏ’ ଅଞ୍ଚଳରେ ସମସ୍ତଙ୍କୁ ଗଛ କାଟିବାରୁ ବିରତ କରାଇବାର ଚେଷ୍ଟା ରେ ଥାଏ ମୁଁ। ଯଦି ଅତ୍ୟଧିକ ଆବଶ୍ୟକତାରୁ କାହାକୁ ବି ଗଛ କାଟିବାକୁ ପଡୁଛି ତ ତାଙ୍କୁ ମୋର ବିନୀତ ଅନୁରୋଧ – ଗଛଟିଏ ଯଦି କାଟୁଛନ୍ତି ତାହାଲେ ଦୁଇଟି ନୂଆ ଗଛ ଲଗାନ୍ତୁ ଆଉ ତାର ଯତ୍ନ ନିଅନ୍ତୁ । ଦେଖିବେ ଆପଣଙ୍କରଏଇ ଛୋଟିଆ ଉଦ୍ୟମ ଭବିଷ୍ୟତ ପୀଢି ପାଇଁ ପରିବେଶ ସୁରକ୍ଷା ଦିଗରେ କେତେ ବଡ ଅବଦାନ ହୋଇପାରିବ।
‘ବୃକ୍ଷ ରକ୍ଷତି ରକ୍ଷିତଃ’ -‘ଗଛ ବଞ୍ଚିଲେ ବଞ୍ଚିବ ଜଗତ , ବଞ୍ଚିବେ ମଣିଷ’ – ଏକଥାକୁ ହୃଦୟରେ ଧରି ନିରବଚ୍ଛିନ୍ନ ଭାବେ କାମ କରି ଚାଲିଥବା ଆସ୍ତରଙ୍ଗ ବେଳାଭୂମୀ ହାଇସ୍କୁଲର ଭଟ୍ଟ ମାଷ୍ଟ୍ରେ ଙ୍କୁ ଆମର ହୃଦୟଭରା ସାଧୁବାଦ। ସେ ଆମ ସଭିଙ୍କର ପ୍ରେରଣା।
