ଭଗବାନଙ୍କର ଦେଖିହେଉଥିବା ପାଶ୍ୱର୍ଟି ପ୍ରକୃତି ଏବଂ ପ୍ରକୃତିର ଦେଖାଯାଉନଥିବା ପାଶ୍ୱର୍ଟି ହେଉଛି ଭଗବାନ । କଥାଟିକୁ କହିଥିଲେ ଆଧ୍ୟାତ୍ମିକଗୁରୁ ଓଶୋ । ପ୍ରକୃତି ଭଗବାନ ହେଉ ବା ଆମର ମା’, ତା’ର ପ୍ରଭାବ, ତା’ର ଆବଶ୍ୟକତାକୁ ଅନୁଭବ କରୁଥିବା ଓ ତାକୁ ଆହୁରି ସବଳ ସୁନ୍ଦର କରି ତାକୁ ପାଖେପାଖେ ଜାବୁଡିଧରିବାକୁ ଚାହୁଁଥିବା ମଣିଷଙ୍କ ମଧ୍ୟରେ ଜଣେ ହେଉଛନ୍ତି ପୁରୀ ବୀରହରେକୃଷ୍ଣପୁରର ପ୍ରଫୁଲ କୁମାର ତ୍ରିପାଠୀ । ପୁରୀର ବିଭିନ୍ନ ଗାଁଗହଳି, ରାସ୍ତାଘାଟରେ ଲୋକ କିନ୍ତୁ ତାଙ୍କୁ ଜାଣନ୍ତି ‘ଗଛ ସାର’ ଭାବେ ।
ଏକଦା ଶିକ୍ଷକତା କରୁଥିବା ପ୍ରଫୁଲ ବାବୁ ଅବସର ପରେ ତାଙ୍କର ସମସ୍ତ ସମୟ ନିୟୋଜିତ କରିଦେଇଛନ୍ତି ଗଛମାନଙ୍କ ପାଇଁ । ସୂର୍ଯ୍ୟଉଦୟ ହେବାଠୁ ଅସ୍ତଯାଏଁ ସେ ଲାଗିଥାନ୍ତି ବିଭିନ୍ନ ଗଛ, ଚାରା, ଫୁଲ, ଫଳମାନଙ୍କୁ ବଢେଇବା ରକ୍ଷଣାବେକ୍ଷଣା କରିବା ଆଦି କାର୍ଯ୍ୟରେ । ନିମ, ପଣଷ, ତୁଳସୀ ପରି ଚାରା ସବୁ ପ୍ରସ୍ତୁତ କରି ତାକୁ ପୁରୀର ବିଭିନ୍ନ ରାସ୍ତାଘାଟ ପାଶ୍ୱର୍ରେ ଲଗେଇବା, ବଢେଇବା, ଯତ୍ନ ନେବା ତାଙ୍କର ପ୍ରତିଦିନର କାର୍ଯ୍ୟ ।
ସାଧାରଣ ଆଖିରେ ଏହା ଏକ ଦାୟିତ୍ୱ ପରି ଲାଗୁଥାଇପାରେ କିନ୍ତୁ ପ୍ରଫୁଲ ବାବୁ ଏସବୁ କରନ୍ତି ଖୁସିରେ । ଗଛ ଫୁଲ ପତ୍ରଙ୍କ ସହ ସମୟ ବିତେଇବାରେ ସେ ପାଆନ୍ତି ଅବ୍ୟକ୍ତ ଆନନ୍ଦ । ଏବଂ ଏହି ଆନନ୍ଦକୁ ସେ ବାଂଟିବାକୁ ଚାହାନ୍ତି ସମସ୍ତଙ୍କ ସହ । ବିଭିନ୍ନ ଅବସରରେ ସାଇକେଲରେ ଗଛ ଧରି ପଂହଚିଯାଆନ୍ତି ପୁରୀର ଆଖପାଖ ଅଂଚଳମାନଙ୍କରେ – ବୃକ୍ଷରୋପଣ ପାଇଁ । ତାଙ୍କୁ ଲୋକ ଦେଖି ଖୁସିରେ କହନ୍ତି “ହେଇ ଗଛସାର୍ ଆସିଗଲେ” ।
ଓଶୋଙ୍କ କଥା ଅନୁସାରେ ପ୍ରକୃତି ଓ ଭଗବାନ ଏଇ ଧରାର ଦୁଇପାଶ୍ୱର୍ । ପ୍ରଫୁଲ ବାବୁ ପ୍ରକୃତି ମାଧ୍ୟମରେ ହିଁ ପଂହଚିଯାଆନ୍ତି ଭଗବାନଙ୍କ ପାଖରେ । ପ୍ରତିଦିନ ସଂଧ୍ୟା ପୂର୍ବରୁ ତୁଳସୀ, ଫୁଲମାଳ ସବୁ ଏକାଠି କରି ମନ୍ଦିରରେ ଜଗନ୍ନାଥଙ୍କୁ ନେଇ ଦେବା ତାଙ୍କର ଦିନର ଶେଷ କାମ ।
ଏକ ବଡ କାମ କରି ପୃଥିବୀକୁ ରାତାରାତି ବଦଳେଇଦେବାର ସ୍ୱପ୍ନ ଅନେକ ଦେଖନ୍ତି । କିନ୍ତୁ ପୃଥିବୀକୁ ବଦଳେଇବାର ସ୍ୱପ୍ନ ନଦେଖି ବରଂ ପୃଥିବୀକୁ ପୃଥିବୀପରି ଧରି ରଖିବା ହିଁ ହେଉଛି ଏଥିରେ ବସବାସ କରୁଥିବା ଲୋକଙ୍କ ଦାୟିତ୍ୱ । ଏବଂ ଏଇ ଦାୟିତ୍ୱକୁ ଦାୟିତ୍ୱ ନଭାବି ଏହାକୁ ସ୍ନେହପ୍ରେମ ଭଲପାଇବା ଭାବିବାକୁ ପ୍ରେରଣା ଯୋଗାନ୍ତି ଗଛସାର୍ । ଗଛ ଲଗେଇବା ସହ ବିଭିନ୍ନ ସାମାଜିକ ସେବାରେ ନିଜ ଅବସର ସମୟ କାଟୁଥିବା ପ୍ରଫୁଲବାବୁଙ୍କୁ ତାଙ୍କର ଛୋଟ କିନ୍ତୁ ମହତ କାର୍ଯ୍ୟପାଇଁ ମିଳିଛି ଅନେକ ପୁରସ୍କାର, ସମ୍ମାନ, ସମ୍ବର୍ଦ୍ଧନା । କିନ୍ତୁ ସବୁ ପୁରସ୍କାର ସମ୍ମାନଠୁ ତାଙ୍କୁ ଅଧିକ ଖୁସି ଦିଏ ମଂଜିରୁ ନୂଆ କଅଁଳିଥିବା ଚାରାର ଦୃଶ୍ୟ, ଫୁଲଗଛରେ ଧରିଥିବା ନୂଆ କଢିର ସ୍ପର୍ଶ ।
ଏକ ସମ୍ପତିଲୋଭୀ, କ୍ଷମତାଅନ୍ଧ, ଦୁର୍ନିତିଖୋର ସମାଜରେ ପୁରୀର ପ୍ରଫୁଲ କୁମାର ତ୍ରିପାଠୀ ବା ଗଛସାର୍ ଓଡିଶା ପାଇଁ ପ୍ରେରଣା ଏବଂ ତାଙ୍କ ପାଇଁ ଓଡିଶା ସମଗ୍ର ବିଶ୍ୱ ପାଇଁ ପ୍ରେରଣା । ଗଛଫୁଲପତ୍ରଙ୍କ ସହ ମିଶି ହସୁଥିବା, ଖୁସିରେ ରହୁଥିବା ଓ ପରିବେଶକୁ ଖୁସିରେ ରଖୁଥିବା ଏଇ ଆତ୍ମାଙ୍କୁ ଆମର ପ୍ରଣାମ ।
