ବର୍ତ୍ତମାନ ସମୟରେ ପାଣି ପବନ ମୂର୍ତ୍ତିକା ସବୁଠି ପ୍ରଦୁଷଣର ମାତ୍ରା ବଢ଼ିବା ସହ ମଣିଷର ଜୀବନଶୈଳୀ ତାକୁ କ୍ରମଶଃ ରୋଗ ମୁହଁକୁ ଠେଲି ଦେଉଛି । ବିନା ଓøଷଧ ଓ ଚିକିତ୍ସା ବ୍ୟବସ୍ଥାରେ ନିରୋଗ ରହିବା ଆଜିର ଦିନରେ ଅସମ୍ଭବ ହୋଇପଡ଼ିଛି । ତେଣୁ ଉତ୍ତମ ସ୍ୱାସ୍ଥ୍ୟସେବାର ଗୁରୁତ୍ୱ ବର୍ତ୍ତମାନ ସମୟରେ ଅନେକ ବଢ଼ିଯାଇଛି ।
ତେଣୁ ସମୟର ଆବଶ୍ୟକତାକୁ ଉପଲବ୍ଧି କରି “ଆପଣ ଗୁରୁତ୍ୱପୂର୍ଣ୍ଣ” (You Matter)ର ଥିମ୍ ନେଇ ୨୦୨୦ ମସିହାରୁ କାମ କରିଆସୁଛି ଅମ୍ରିତ ଧାରା ପାଲିଏଟିଭ୍ କେୟାର ଟ୍ରଷ୍ଟ । ପାଲିଏଟିଭ୍ କେୟାର ହେଉଛି ଏକ ପ୍ରକାର ଚିକିତ୍ସା ବ୍ୟବସ୍ଥା ଯାହା ଦ୍ୱାରା ପୁରୁଣା କଷ୍ଟସାଧ୍ୟ ରୋଗରେ ପିଡ଼ିତ ବ୍ୟକ୍ତିର ଶାରିରୀକ ଓ ମାନସିକ କଷ୍ଟର ଉପଚାର କରାଯାଏ । ପାଲିଏଟିଭ୍ କେୟାର ଟିମ୍ ରୋଗୀ ଓ ତାଙ୍କ ପରିବାର ସହ ମିଶି କାମକରନ୍ତି ।
ଅମ୍ରିତ ଧାରା ପାଲିଏଟିଭ୍ କେୟାର ଟ୍ରଷ୍ଟ ହେଉଛି ଏକ ପଞ୍ଜୀକୃତ ସ୍ୱେଚ୍ଛାସେବୀ ଅନୁଷ୍ଠାନ ବା ଏନ୍.ଜି. ଓ ଯାହା ପାଲିଏଟିଭ୍ କେୟାରର ଗ୍ଲୋବାଲ ଡ଼ିରେକ୍ଟୋରୀ ତାଲିକାଭୁକ୍ତ ଓ ଏହା ଭୁବନେଶ୍ୱର ପଟିଆର ଲକ୍ଷ୍ମୀନଗରରେ ଅବସ୍ଥିତ । କରୋନା ମହାମାରୀ ପୂର୍ବରୁ ଆରମ୍ଭ ହୋଇଥିବା ଏଇ ଅନୁଷ୍ଠାନର ମତରେ- ବହୁ ପୁରୁଣା କଷ୍ଟସାଧ୍ୟ ରୋଗ ସହ କ୍ୟାନସର ଭଳି କଷ୍ଟସାଧ୍ୟ ରୋଗରେ ପୀଡ଼ିତମାନେ ଯେ ଜୀବନଯାକ କଷ୍ଟ ଓ ଯନ୍ତ୍ରଣାରେ ରହିବେ ତାହା ଭୁଲ । ପାଲିଏଟିଭ୍ କେୟାର ଟିମ୍ ଚିକିତ୍ସା ମାଧ୍ୟମରେ ରୋଗୀର କଷ୍ଟକୁ ଦୁର କରିବା ସହ ମାନସିକ ସୁସ୍ଥତା ଉପରେ ମଧ୍ୟ କାମ କରନ୍ତି । ଉତ୍ତମ ଚିକିତ୍ସା ସହ ସେମାନଙ୍କ ମାନସିକ ଓ ସାମାଜିକ ସ୍ତରରେ ଉନ୍ନତି ଆସେ । ଫଳରେ ଜୀବନ କ୍ରମଶଃ ହୋଇଯାଏ ସହଜ ।
“ମୃତ୍ୟୁକୁ ଏଡ଼ାଇ ହେବ ନାହିଁ ସତ କିନ୍ତୁ ଯନ୍ତ୍ରଣାକୁ ଏଡ଼ାଇବା ସମ୍ଭବ । ଏଭଳି ଚିନ୍ତାଧାରା ନେଇ ନମ୍ରତା ରଥ ଓ ଡ଼ଃ ମାମି ପରିଜାଙ୍କ ଦ୍ୱାରା ଆରମ୍ଭ ହୋଇଥିବା ଅମ୍ରିତ ଧାରା କେୟାର ଟ୍ରଷ୍ଟ କ୍ୟାନସର ସହ ପୁରୁଣା କଷ୍ଟସାଧ୍ୟ ରୋଗରେ ପୀଡ଼ିତ ରୋଗୀଙ୍କୁ ଯୋଗାଇ ଦେଉଛି ମାଗଣା ଚିକିତ୍ସା । ଏଠାରେ ପୀଡ଼ିତ ବ୍ୟକ୍ତିର ଶାରିରୀକ ଓ ମାନସିକ କଷ୍ଟର ଉପଚାର କରାଯାଏ ।”
କୁହନ୍ତି ସଂସ୍ଥାର ଉପାଦେଷ୍ଠା– ଡ଼ଃ ବିଧୁ.କେ. ମହାନ୍ତି
ବାର୍ଦ୍ଧକ୍ୟ, ଅସୁସ୍ଥତା, ଶାରୀରୀକ ଓ ମାନସିକ କଷ୍ଟରେ ପୀଡ଼ିତ ବ୍ୟକ୍ତିମାନଙ୍କର ଉପଚାର ପାଇଁ ଅମ୍ରିତ ଧାରା ପାଲିଏଟିଭ୍ କେୟାର ଟ୍ରଷ୍ଟ ପକ୍ଷରୁ ଉତ୍ତମ ଚିକିତ୍ସା ସହ ଯୋଗାଇ ଦିଆଯାଏ ସମସ୍ତ ଆବଶ୍ୟକୀୟ ସୁବିଧା ସୁଯୋଗ । ଅମ୍ରିତଧାରାର କୁଶଳୀ ଡ଼ାକ୍ତର, ନର୍ସ, ପରାମର୍ଶଦାତା ଓ ପ୍ରତିବଦ୍ଧ ସ୍ୱେଚ୍ଛାସେବୀ ମାନେ ଗତ ଚାରିବର୍ଷ ମଧ୍ୟରେ ଚିକିତ୍ସା ମାଧ୍ୟମରେ ୫୦୦ ରୁ ଅଧିକ ରୋଗୀଙ୍କ ଯନ୍ତ୍ରଣା ପରିଚାଳନା କରିବା ସହ ଯୋଗାଇ ଆସୁଛନ୍ତି ନିରନ୍ତର ସେବା । ଚିକିତ୍ସିତ ହେଉଥିବା ରୋଗୀ ଓ ସେମାନଙ୍କ ପରିବାରର ଆବଶ୍ୟକତାକୁ ପ୍ରଥମେ ଭଲ ଭାବରେ ବୁଝାଯାଏ ଫଳରେ ସର୍ବର୍ତ୍ତୋମ ସେବା ଯେଗୋଇଦେବା ହୁଏ ସମ୍ଭବ ।
ଅମ୍ରିତ ଧାରା ପାଲିଏଟିଭ୍ କେୟାର ଟ୍ରଷ୍ଟର ଏକ ସିକୃତିପ୍ରାପ୍ତ ଫାର୍ମାସୀ ଯାହାର ଲାଇସେନ୍ସ ସହ ଆର.ଏମ୍.ଆଇ ଲାଇସେନ୍ସ ମଧ୍ୟ ରହିଛି । ଫଳରେ ଯନ୍ତ୍ରଣା ନିୟନ୍ତ୍ରଣ ପାଇଁ ବ୍ୟବହାର ହେଉଥିବା ମୋର୍ଫିନ ଔଷଧ ରୋଗୀମାନଙ୍କୁ ସହଜରେ ଓ ମାଗଣାରେ ମିଳିପାରୁଛି । ଏଇ ଚାରିବର୍ଷ ମଧ୍ୟରେ ଅମ୍ରିତ ଧାରା ୨୪୦ ଅଧିକ ସ୍ୱେଚ୍ଛାସେବୀଙ୍କୁ ପ୍ରଶିକ୍ଷିତ କରିବା ସହ ୫୦ ଜଣ ସ୍ୱାସ୍ଥ୍ୟସେବା ବିଷେଶଜ୍ଞଙ୍କୁ ପ୍ରଦାନ କରିଛି ପ୍ରଶିକ୍ଷଣ । ଟ୍ରେନିଂ, ସେମିନାର, ସଚେତନତା କାର୍ଯ୍ୟକ୍ରମ ମାଧ୍ୟମରେ ପାଲିଏଟିଭ୍ ସେବା ବିଷୟରେ ଲୋକଙ୍କୁ କରାଯାଉଛି ସଚେତନ ।
ଏଠାରେ ଯୋଗାଇ ଦିଆଯାଉଥିବା ସେବାମାନଙ୍କ ମଧ୍ୟରେ ବାର୍ଦ୍ଧକ୍ୟ ସମୟରେ ଉପଯୁକ୍ତ ଯତ୍ନ, କ୍ୟାନସର ସେବା, ଯନ୍ତଣାର ଉପଚାର, ଓøଷଧ ସେବା, ପରିସ୍କାର ପରିଛନ୍ନତା, ଚିକିତ୍ସା ପରାମର୍ଶ, ସାମାଜିକ ଓ ଆଧ୍ୟାତ୍ମିକ ସହାୟତା, ପ୍ରଶିକ୍ଷଣ କର୍ମଶାଳା, ସାମୁହିକ ସଚେତନତା ଆଦି ଅର୍ନ୍ତଭୁକ୍ତ । ଅମ୍ରିତ ଧାରାର ଏ କାମରେ ସହଯୋଗ କରୁଥିବା ସ୍ୱେଚ୍ଛାସେବୀ ମାନଙ୍କର ନିଃସ୍ୱାର୍ଥପର ସହଯୋଗ ପାଇଁ ଲୋକଙ୍କୁୁ ସହାୟତା ପ୍ରଦାନ କରିବା ହୋଇପାରୁଛି ସମ୍ଭବ । ଲୋକମାନଙ୍କ ମଧ୍ୟରେ ସଚେତନତା ସୃଷ୍ଟି କରିବାଠୁ ଆରମ୍ଭକରି ରୋଗୀ ଓ ପରିବାରକୁ ବୁଝାଇବା ଏବଂ ସେମାନଙ୍କୁ ଚିକିତ୍ସା ବ୍ୟବସ୍ଥାରେ ସାମିଲ୍ କରିବା ପର୍ଯ୍ୟନ୍ତ ସବୁ କ୍ଷେତ୍ରରେ ସ୍ୱେଚ୍ଛାସେବୀମାନଙ୍କ ରହିଛି ଭରପୁର ସହଯୋଗ ।
ଅମ୍ରିତ ଧାରା ପାଲିଏଟିଭ୍ କେୟାର ଟ୍ରଷ୍ଟ ସବୁବେଳେ ନିଜର କାର୍ଯ୍ୟଦକ୍ଷତାକୁ ଉନ୍ନତ କରିବା ଦିଗରେ କାମ କରେ । ଏଥିପାଇଁ ଉନ୍ନତ ତାଲିମ୍ ଅନୁସନ୍ଧାନ ସହ ସ୍ୱାସ୍ଥ୍ୟ ବ୍ୟବସ୍ଥାର ନୂଆନୂଆ ଦିଗକୁ ଗ୍ରହଣ କରିବା ପାଇଁ ସଦା ପ୍ରୟାସରତ । ସ୍କୁଲ, କଲେଜ, କମ୍ୟୁନିଟି ସ୍ତରରେ ବିଭିନ୍ନ କର୍ମଶାଳା, ପ୍ରଶିକ୍ଷଣ, ସେମିନାର ଓ ସଚେତନତା ଶିବିର ମାଧ୍ୟମରେ ଅମ୍ରିତ ଧାରା ଯେ କେବଳ ସ୍ୱେଚ୍ଛାସେବୀଙ୍କ ସହଯୋଗକୁୁ ମଜବୁତ୍ କରୁଛି ତାହା ନୁହେଁ ବରଂ ପାଲିଏଟିଭ୍ ମେଡ଼ିକାଲ୍ କେୟାରର ଗୁରୁତ୍ୱକୁ ମଧ୍ୟ ଓଡ଼ିଶାର ଜନସାଧାରଣଙ୍କ ପାଖରେ ପହଞ୍ଚାଇ ପାରୁଛି ।
ଅମ୍ରିତ ଧାରାର ଲକ୍ଷ୍ୟ ଆପଣଙ୍କୁ ସମ୍ପୂର୍ଣ୍ଣ ଯତ୍ନ ଓ ସେବା ଯୋଗାଇ ଦେବା ଯାହା ଆପଣଙ୍କ ରୋଗର ଯନ୍ତ୍ରଣାକୁ ଦୂର କରି ଜୀବନକୁ କରିଦେବ ସହଜ । ଅମ୍ରତି ଧାରାର ଏଇ ନିଃସ୍ୱାର୍ଥପର କାମକୁ ଆମ ଟିମ୍ ପକ୍ଷରୁ ଅନେକ ଅନେକ ସାଧୁବାଦ ।
