ଦୃଢ ଇଚ୍ଛାଶକ୍ତି ଓ କଠିନ ପରିଶ୍ରମ ବଳରେ ଅସମ୍ଭବକୁ ସମ୍ଭବ କରି ଦେଖେଇଛନ୍ତି ଓଡିଶା ଦାରିଙ୍ଗବାଡି ବ୍ଲକ ବୋଣ୍ଡାପଙ୍କା ଗାଁର ଧନେଶ୍ଵର ପ୍ରଧାନ । ଆଦିବାସୀ ଅଧ୍ୟୁଷିତ ଗାଁ ହୋଇଥିବାରୁ ଗାଁକୁ ସଡକ ସହ ସଂଯୋଗ କରିବା ପାଇ ରାସ୍ତାଟେ ନଥିଲା, ପିଲାଟିବେଳୁ ନିଜସହ ଗାଁ ଲୋକଙ୍କର ଦୁଃଖଦୁର୍ଦଶା ବ୍ୟତିବ୍ୟସ୍ତ କରିଥିଲା ଧନେଶ୍ଵରଙ୍କୁ । ଆଖପାଖରେ ସ୍ୱାସ୍ଥ୍ୟ ସୁବିଧା ନଥିବାରୁ ନାନା ପ୍ରକାରର ସମସ୍ୟା ଭିତରେ ରହୁଥିଲେ ଗାଁ ଲୋକେ, ଆଉ ରାତି ଅଧରେ ଦେହ ଖରାପ ହେଲେତ କଥା ସରିଲା ।
ବାରମ୍ବାର ଗୁହାରି ସତ୍ୱେ ଜିଲ୍ଲା ପ୍ରଶାସନ ଓ ପଞ୍ଚାୟତରୁ ନିରାଶ ହେବାକୁ ପଡିଥିଲା ତାଙ୍କୁ । ଗାଁରେ ନା ଅଛି ବିଜୁଳି, ପକ୍କାଘର, ପାନୀୟଜଳର ସୁବିଧା, ନା ଗାଡି ମୋଟର ଯାଇଆସୁଥିବା ରାସ୍ତାଟିଏ । ଫଳରେ ଗାଁ ଲୋକଙ୍କୁ ନିଜ ଅତ୍ୟାବଶ୍ୟକ ଜିନିଷ ଆଣିବା ଠୁ ଆରମ୍ଭ କରି ନିଜ ଉତ୍ପାଦିତ ସାମଗ୍ରୀକୁ ବିକ୍ରିବଟା କରିବାକୁ ବେଶ ହଇରାଣ ହବାକୁ ପଡୁଥିଲା । ଆଉ ଯିବା ଆସିବାରେ ବାଧକ ସାଜୁଥିଲା ସାମ୍ନାରେ ଥିବା ବଡେପଙ୍ଗା ପାହାଡ ।
ବାରଟି ପରିବାରକୁ ନେଇ ଗଠିତ ନିଜ ଗାଁକୁ କେରୁବାଡି ମୁଖ୍ୟ ରାସ୍ତା ସହ ସଂଯୋଗ କରିବାର ସଂକଳ୍ପ ନେଲେ ଧନେଶ୍ଵର । ବୁଝାଇଲେ ଗାଁ ଲୋକଙ୍କୁ ମିଳିମିଶି ରାସ୍ତା ନିର୍ମାଣ ପାଇଁ, କିନ୍ତୁ ଗାଁର ପ୍ରାୟ ଲୋକ ଦିନ ମଜୁରିଆ ହୋଇଥିବାରୁ ମାଗଣାରେ ରାସ୍ତା ତିଆରି କରିବାକୁ ରାଜି ହେଲେଣି କେହି । ହେଲେ ନିଜ ଇଚ୍ଛାଶକ୍ତିକୁ ସୁଦୃଢ କରି ନିଜେ ଏଇ ୬ କିଲୋମିଟର ରାସ୍ତାକୁ ନିର୍ମାଣ କରିବାକୁ ନେଲେ ପ୍ରତିଜ୍ଞା, ଆଉ ନିଜ ପରିବାର ସହ ନିରନ୍ତର ଭାବେ ଲାଗିପଡିଲେ ରାସ୍ତାକାମରେ । ଏହାଦେଖି ପ୍ରଥମେ-ପ୍ରଥମେ କାମ ପାଇଁ ମନା କରୁଥିବା ଗାଁ ଲୋକ ଧନେଶ୍ଵରଙ୍କୁ ବଢାଇଲେ ସହାୟତାର ହାତ ।
“ମୋ ଏଇ କାମରେ ମୋ ପରିବାର ମୋତେ ପୁରା ସହଯୋଗ କରିଛି, ମୋ ସ୍ତ୍ରୀ-ପିଲା ଛୁଆ ମୋ ସହ ମିଶି ରାସ୍ତା କାମରେ ଲାଗିଲେ ଯାହା ମୋତେ ଯୋଗାଇଲ ପ୍ରେରଣା, ଆଉ ଆମ ଗାଁ ଲୋକବି ମତେ ସାହାଯ୍ୟ କରୁଛନ୍ତି ।”
ଏମିତି ଦିନ ରାତିକୁ ଏକକରି କାମ କରୁ-କରୁ କିଛି ସାମାଜିକ କର୍ମୀଙ୍କ ନଜର ପଡିଲା ଧନେଶ୍ଵରଙ୍କ ଉପରେ । ଧନେଶ୍ଵରଙ୍କଠୁ ସବୁ କଥା ଶୁଣି ସାରିଲାପରେ ତାଙ୍କର ଏଇ ମହତ କାମର ପ୍ରଚାର-ପ୍ରସାର କଲେ । କ୍ରମଶଃ ଏହା ପ୍ରଶାସନ ସହ ସରକାରଙ୍କ ନଜରରେ ପଡିଲା ଆଉ ଏବେ ସରକାର ରାସ୍ତା ପାଇଁ ଘୋଷଣା କରିଛନ୍ତି ସରକାରୀ ସହାୟତା ।
“ଜିଲ୍ଲା ପ୍ରଶାସନର ସହାୟତା ପାଇ ଆମେ ଭାରି ଖୁସି, ଏବେ ମୋ ଗାଁର ଲୋକଙ୍କୁ ଆଉ ପାହାଡ ଚଢି କେରୁବାଡି ଯିବାକୁ ପଡିବନି ଆଉ ସରକାର ମଧ୍ୟ ଆମ ଗାଁର ଉନ୍ନତି ପାଇଁ ପଦକ୍ଷେପ ନେବାପାଇଁ ପ୍ରତିଶ୍ରୁତି ଦେଇଛନ୍ତି ।”
ଏବେସୁଦ୍ଧା ରାସ୍ତାର ୪ ଭାଗରୁ ୩ ଭାଗ କମ ସରିଥିବା ବେଳେ ଖୁବଶୀଘ୍ର ଏହାର କାମହେବ ସମ୍ପୂର୍ଣ । ନିଜର ନିଷ୍ଠାପର ଉଦ୍ୟମ ପାଇଁ ଧନେଶ୍ଵର ତାଙ୍କ ଅଞ୍ଚଳ ପାଇଁ ପାଲଟିଛନ୍ତି ଆଦର୍ଶ ।
