କଥାରେ କଥାରେ ପ୍ରାୟ ଲୋକ କହନ୍ତି, ‘ରକ୍ତଦାନ, ସତରେ ମହତ୍ଦାନ’। ଏଇ କଥାଟିକୁ କାର୍ଯ୍ୟକାରୀ କରାଇବାକୁ କେତେଜଣ ସାମ୍ନାକୁ ଆସନ୍ତି? ହାତଗଣତି କେତେଜଣ ବଦାନ୍ୟ ବ୍ୟକ୍ତିଙ୍କ ଚେଷ୍ଟାରେ ଏସବୁ ସମାଜ ସେବା ଚାଲିଛି। ସେହିଭଳି ଜଣେ ବ୍ୟକ୍ତି ହେଉଛନ୍ତି ଧୀରେନ୍ଦ୍ର ଠାକୁର।
ବଡ଼ ବଡ଼ ଡାକ୍ତରଖାନାର ଡାକ୍ତରମାନେ ମଧ୍ୟ ଧୀରେନ୍ଦ୍ରଙ୍କ ଭରସାରେ ରୋଗୀକୁ ଆଶ୍ବସନା ଦେଇଥାନ୍ତି। ବିରଳ ରକ୍ତ ଗ୍ରୁପ୍ର ଲୋକଙ୍କ ପାଇଁ ସେ ନିଜ ପାରୁପର୍ଯ୍ୟନ୍ତ ଚେଷ୍ଟା କରି ରକ୍ତ ଯୋଗାଡ଼ କରନ୍ତି। ନିଃସ୍ବାର୍ଥପର ଭାବେ ଦିନରାତି କାମ କରି ଅନ୍ୟ ସେବାରେ ସେ ଖୁସି ପାଉଥିବାର କହିଛନ୍ତି। ୨୦୦୯ରେ ଧୀରେନ୍ଦ୍ରଙ୍କ ଯାତ୍ରା ଆରମ୍ଭ ହେଲା। ଏହି ବାଟରେ ତାଙ୍କୁ ମାର୍ଗ ଦେଖାଇଥିଲେ ଡାକ୍ତର ଦେବାଶିଷ ମିଶ୍ର। ରେଡ୍ କ୍ରସ୍ ବ୍ଲଡ୍ ବ୍ୟାଙ୍କର ନିର୍ଦେଶକ ଭାବେ କାମ କରୁଥିବା ଡାକ୍ତର ମିଶ୍ର ବୁଝାଇଥିଲେ, ଆମ ଦେଶରେ ଓ ରାଜ୍ୟରେ ରକ୍ତଅଭାବ ଜନିତ ମୃତ୍ୟୁ ସଂଖ୍ୟା କିଭଳି ଭାବେ ବଢ଼ିଚାଲିଛି। ଲୋକେ ସଚେତନ କିନ୍ତୁ ରକ୍ତଦାନ କରିବାକୁ ସହଜରେ ମଣିନଥାନ୍ତି। ଏକବିଂଶ ଶତାବ୍ଦୀର ଶିକ୍ଷିତ ଲୋକ ଅନ୍ୟଠାରୁ ସାହାଯ୍ୟ ଆଶା କରନ୍ତି ସତ କିନ୍ତୁ ନିଜେ ସାହାଯ୍ୟ କରିବାକୁ ଭାରି କୁଣ୍ଠାବୋଧ କରନ୍ତି। ଲୋକଙ୍କ ମାନସିକତା ଜାଣି ପ୍ରଥମେ ନିଜେ ଆଗକୁ ବଢ଼ିଲେ ଧୀରେନ୍ଦ୍ର। ପ୍ରଥମଥର ଭୁବନେଶ୍ବରର କ୍ୟାପିଟାଲ୍ ହସ୍ପିଟାଲ୍ରେ ଆନେମିଆରେ ପୀଡ଼ିତ ରୋଗୀକୁ ସେ ରକ୍ତଦାନ କଲେ। ସେଦିନର ଅନୁଭୂତି ଆଜି ପର୍ଯ୍ୟନ୍ତ ଭୁଲିନାହାନ୍ତି ଧୀରେନ୍ଦ୍ର। ଭାରି ଆତ୍ମସନ୍ତୋଷ ଲାଗିଥିଲା ତାଙ୍କୁ, ପରୋପକାର କରିବାକୁ ଅଧିକ ଉତ୍ସାହିତ ହେଲେ ସେ। ଏଥରକ ନିଜ ସାଙ୍ଗସାଥିଙ୍କୁ ମଧ୍ୟ ଧୀରେନ୍ଦ୍ର ଅନୁରୋଧ କଲେ ରକ୍ତଦାନ କରିବାକୁ।
କିଛି ମାସ ପରେ ଧୀରେନ୍ଦ୍ର ନିୟମିତ ଭାବେ ରକ୍ତଦାନ କରିବାକୁ ଲାଗିଲେ। ଥାଲାସେମିଆ, ଆନେମିଆ, କର୍କଟରୋଗୀ, ଦୁର୍ଘଟଣାରେ ଆହତ ଲୋକ ସମସ୍ତଙ୍କୁ ସାହାଯ୍ୟ କରିବାକୁ ସେ ଆଗେଇଲେ। ଏସବୁ ଭିତରେ ନିଜ ଚିହ୍ନାପରିଚିତଙ୍କ ରକ୍ତଗ୍ରୁପ୍ ବିଷୟରେ ବିବରଣୀ ରଖିଲେ। କୌଣସି ସମୟରେ ଏମାନଙ୍କର ଯେ ଆବଶ୍ୟକତା ନ ପଡ଼ିବ, କିଏ କହିବ। କେତେଜଣ ରକ୍ତଦାତାଙ୍କ ସହ ଯୋଗାଯୋଗ କରି ଧୀରେନ୍ଦ୍ର ‘ଲାଇଫ୍ ଚାରିଟେବଲ୍ ଟ୍ରଷ୍ଟ’ ପ୍ରତିଷ୍ଠା କଲେ। ଏହି କାମରେ ତାଙ୍କୁ ବନ୍ଧୁ ଅଙ୍କିତ ଜୈନ୍, ଅନୁପମା ଦିଗଲ, ରୋଶନ୍ କୁମାର ଶାହ ସାହାଯ୍ୟ କଲେ। କଟକ-ଭୁବନେଶ୍ବରର ବିଭିନ୍ନ ଅଞ୍ଚଳରେ କ୍ୟାମ୍ପ୍ କରି ରକ୍ତଦାନ ଅଭିଯାନ ଚଳାଇଲେ। ସାଧାରଣ ଲୋକଙ୍କୁ ରକ୍ତଦାନ କରିବା ପାଇଁ ବୁଝାଇବା ଆଦୌ ସହଜ ନଥିଲା। କିନ୍ତୁ ଧୀରେନ୍ଦ୍ର ଓ ତାଙ୍କ ସହଯୋଗୀମାନେ ଲୋକଙ୍କୁ ରକ୍ତଦାନର ମହତ୍ତ୍ବ ବୁଝାଇ ସଫଳ ହେଉଥିଲେ। ବର୍ତ୍ତମାନ ସମୟରେ ଏହି ଟ୍ରଷ୍ଟରେ ୧୫ଜଣ ସକ୍ରିୟ ରକ୍ତଦାତା ଅଛନ୍ତି ଓ ଦିନରାତି ୨୪ ଘଣ୍ଟା ଏମାନେ କାମ କରୁଛନ୍ତି। ସୋସିଆଲ୍ ସାଇଟ୍, ହ୍ବାଟସ୍ ଆପ୍ ଜରିଆରେ ଏମାନେ ଖବର ସଂଗ୍ରହ କରିବା ସହ ବିରଳ ରକ୍ତଗ୍ରୁପ୍ଧାରୀଙ୍କ ପାଇଁ ମଧ୍ୟ ସଙ୍ଗେସଙ୍ଗେ ବନ୍ଦୋବସ୍ତ କରନ୍ତି। ଗଲା ୧୩ ବର୍ଷ ମଧ୍ୟରେ ଧୀରେନ୍ଦ୍ର ଓ ତାଙ୍କ ସହଯୋଗୀଙ୍କ ଚେଷ୍ଟାରେ ୧୫ହଜାର ରକ୍ତଦାତା ସେମାନଙ୍କ ଟ୍ରଷ୍ଟ ଜରିଆରେ ଯୋଗାଯୋଗ ହୋଇପାରିଛନ୍ତି। କେତେଜଣ ସରକାରୀ ପଦସ୍ଥ ଅଫିସର୍ ମଧ୍ୟ ଏହି ମହତ୍ କାମରେ ସେମାନଙ୍କୁ ସହଯୋଗର ହାତ ବଢ଼ାଇଛନ୍ତି।
ସମାଜର ଧର୍ମ କାମରେ ବ୍ରତୀ ଏଇ ମଣିଷଟି ନିଜ ଜୀବନକୁ ଉତ୍ସର୍ଗ କରିଦେଇଛି। ବିଭିନ୍ନ ବଡ଼ କମ୍ପାନୀରୁ ଡାକରା ପାଇବା ସତ୍ତ୍ବେ ଧୀରେନ୍ଦ୍ର ବରଂ ସମାଜ ସେବାରେ ଆନନ୍ଦ ପାଉଥିବାର କହିଛନ୍ତି। ସେ ଓ ତାଙ୍କ ଟିମ୍ ସଦସ୍ୟ ପୂର୍ଣ୍ଣାଙ୍ଗ ଭାବେ ଏହି କାମକୁ କରୁଛନ୍ତି। ରୋଗୀର ନାମ, ରୋଗ, ଠିକଣା, ଏସବୁ ସହ ରକ୍ତଦାତାଙ୍କ ପୂରା ତଥ୍ୟକୁ ତାଙ୍କ ଟିମ୍ ରଖେ। ଅଭାବନୀୟ ପରିସ୍ଥିତିରେ ରୋଗୀ ପାଇଁ ନେବା-ଆଣିବା ସହ ଡାକ୍ତରଖାନା ଶଯ୍ୟା ମଧ୍ୟ ବ୍ୟବସ୍ଥା କରାଯାଏ।
ଧୀରେନ୍ଦ୍ର ତାଙ୍କ ଅଙ୍ଗେନିଭାଇଥିବା ଘଟଣାଟି କହିଛନ୍ତି, ‘ଜଣେ ହୃଦ୍ରୋଗୀଙ୍କ ହଠାତ୍ ହୃଦଘାତ ପାଇଁ ବି-ନେଗେଟିଭ୍ ରକ୍ତ ସଙ୍ଗେସଙ୍ଗେ ଦରକାର ହେଲା। ସେ ଆଉ ଡେରି ନ କରି ଅଙ୍କିତଙ୍କୁ ଫୋନ୍ କଲେ। ବିଳମ୍ବିତ ରାତି ହୋଇଥିବାରୁ ସଙ୍ଗେସଙ୍ଗେ ଗାଡ଼ି ମିଳୁନଥାଏ। ଶେଷରେ ଜଣେ ସରକାରୀ ଅଫିସର୍ଙ୍କ ସହାୟତା ନେଇ ଅଙ୍କିତ ଡାକ୍ତରଖାନାରେ ପହଞ୍ଚି ରକ୍ତଦାନ କଲେ। ତାଙ୍କ ମହତ୍ ଉଦେଶ୍ୟର ଫଳସ୍ବରୂପ ହୃଦ୍ରୋଗୀଙ୍କ ଜୀବନ ରକ୍ଷା ହେଲା।
କରୋନାର କରାଳ ରୂପ ଯେଉଁ ସମୟରେ ଆରମ୍ଭ ହେଲା, ସେତେବେଳେ ବ୍ଲଡ୍ ବ୍ୟାଙ୍କ୍ର ଅବସ୍ଥା ନ କହିବା ଭଲ। ଧୀରେନ୍ଦ୍ର ନିଜ କଥା ନ ଭାବି ସେଇ ସମୟରେ ମଧ୍ୟ ସାହାଯ୍ୟ ପାଇଁ ଆଗେଇଆସିଥିଲେ। ରକ୍ତଦାନର ମହତ୍ ଉଦ୍ଦେଶ୍ୟ ସେ ବୁଝିଛନ୍ତି କିନ୍ତୁ ସାଧାରଣଲୋକଙ୍କୁ ସେ ବୁଝାଉଛନ୍ତି ଯାହା ବାଧ୍ୟ କରିପାରୁନାହାନ୍ତି।
ରକ୍ତଦାନ ପାଇଁ ବିଭିନ୍ନ ଅନୁଷ୍ଠାନ ତରଫରୁ ପୁରସ୍କୃତ ହୋଇଥିବା ଧୀରେନ୍ଦ୍ର ଓଡ଼ିଶାର ଅଧିକାଂଶ ଡାକ୍ତରଖାନାରେ ଚିହ୍ନା ମୁହଁଟେ। ଈଶ୍ବରଙ୍କ ଇଚ୍ଛାରେ ସେ ଏହି କାମ କରୁଥିବାର କହିଛନ୍ତି। ଉଦାର ମନର ଏଇ ବ୍ୟକ୍ତିତ୍ବଟି ବୁଲା ଗାଈ, କୁକୁରଙ୍କୁ ମଧ୍ୟ ଆଉଁଶି ଦେଇ ଖାଇବାକୁ ଦିଏ। ସ୍ବାର୍ଟ ଯୁଗରେ ଖୁବ୍ ଶୀଘ୍ର ପରିବର୍ତ୍ତନ ହେବ ବୋଲି ସେ ଆଶା କରୁଛନ୍ତି। ଆଉ କିଛି ବର୍ଷରେ ଏଟିଏମ୍ ସେବା ଭଳି ରକ୍ତଦାନ ସେବା ଉପଲବ୍ଧ ହେବ ବୋଲି ଭାବୁଛନ୍ତି ଧୀରେନ୍ଦ୍ର। କୌଣସି ସ୍ବାର୍ଥ କିମ୍ବା ପ୍ରଚାର ଉଦ୍ଦେଶ୍ୟରେ ନୁହେଁ, ବରଂ କାହାର ଜୀବନରକ୍ଷା କରିବାକୁ ଧୀରେନ୍ଦ୍ର ଏହି ରକ୍ତଦାନ କାମରେ ମଙ୍ଗ ଧରିଛନ୍ତି।
ଲାଇଫ୍ଲାଇନ୍ ଚାରିଟେବଲ ଟ୍ରଷ୍ଟ ସହ ଯୋଗାଯୋଗ କରିବାକୁ ୯୬୯୨୩୦୦୦୦୦୯ରେ ଡାଏଲ୍ କରନ୍ତୁ।
