ଅନ୍ଧବିଶ୍ୱାସ ଆମ ସମାଜ ପାଇଁ ଏକ ବ୍ୟାଧି ସଦୃଶ । ବିଶେଷକରି ଗାଁ ଗହଳିରେ ବସବାସ କରୁଥିବା ଲୋକମାନେ ସଚେତନତା ଅଭାବରୁ ଏଇ ଅନ୍ଧବିଶ୍ୱାସରେ ଅଧିକ କବଳିତ ହୁଅନ୍ତି । ଉଦାହରଣ ସ୍ୱରୁପ ମାସିକ ରୁତୁସ୍ରାବ ଯାହା ମହିଳା ମାନଙ୍କର ଏକ ସାଧାରଣ ପ୍ରକ୍ରିୟା,ହେଲ ସଚେତନା ଅଭାବରୁ ଏହାକୁ କେତେକେ ଆଜିବି ବ୍ୟାଧିବୋଲି ଭାବନ୍ତି । ମାସିକ ରୁତୁସ୍ରାବ ସମୟରେ ମହିଳା ମାନଙ୍କୁ ଛୁଆ, ଛୁଇଁ ଠୁ ନେଇ ବାରଣ ଥାଏ ଅନେକ କିଛି । ମୋଟାମୋଟି ଭାବେ କହିବାକୁ ଗଲେ ରୁତୁସ୍ରାବ ସମୟରେ ମହିଳାମାନଙ୍କୁ ସମାଜରୁ ବାଛନ୍ଦ କଲାଭଳି ମନେହୁଏ । କେହି ଏ ବିଷୟରେ ଖୋଲାଖୋଲି ଆଲୋଚନା କରିବାକୁ ମଧ୍ୟ ପସନ୍ଦ କରନ୍ତି ନାହିଁ ଫଳସ୍ୱରୁପ ସଚେତନତା ଅଭାବରୁ ମାସିକ ରୁତୁସ୍ରାବ ସମୟରେ ଉଚିତ୍ ସାନିଟାରୀ ପ୍ୟାଡ଼୍ ବ୍ୟବହର ନକରି ଅନେକ ମହିଳା ସର୍ବାଇକାଲ କ୍ୟାନସର ଭଳି ଆନକ ମାରାତ୍ମକ ରୋଗର ଶିକାର ହୁଅନ୍ତି ।
ରୁତୁସ୍ରାବ ଜନିତ ସଚେତନତାକୁ ଉପଲବ୍ଧିକରି ଲୋକଙ୍କୁ ସଚେତନ କରିବାରେ ଲାଗିପଡ଼ିଛନ୍ତି ପାୟଲ ପଟେଲ୍ । ଝାରସୁଗୁଡ଼ା ଜିଲ୍ଲା ବାଗଡ଼ିହି ବ୍ଲକ ରଙ୍ଗିଆଯିକିର ଗାଁର ବାସିନ୍ଦା ପାୟଲ ଲୋକଙ୍କ ମନରୁ ରୁତୁସ୍ରାବ ଜନିତ ଅନ୍ଦବିଶ୍ୱାସକୁ ଦୁରାଇବା ସହ ରୁତୁସ୍ରାବ ସମୟରେ ପ୍ୟାଡ଼୍ର ବ୍ୟବହାର ଓ ବ୍ୟକ୍ତିଗତ ସ୍ୱଚ୍ଛତା ବିଷୟରେ ମହିଳାମାନଙ୍କୁ କରୁଛନ୍ତି ସଚେତନ । ପ୍ରଶାନ୍ତ ପଟେଲ ଓ ସବିତା ପଟେଲଙ୍କ ବଡ଼ଝିଅ ପାୟଲ ଅଳ୍ପବୟସରୁ ନିଜ ବାପାଙ୍କୁ ହରାଇଥିଲେ । କ୍ୟାନସରରେ ପିଡ଼ିତ ବାପାଙ୍କ ବିୟୋଗ ପରେ ଘରର ଭରଣ ପୋଷଣରେ ସହଯୋଗ କରିବା ପାଇଁ ପାୟଲ୍ ନିଜର ଏକ ବ୍ୟବସାୟ ଆରମ୍ଭ କରିବାର ନଷ୍ପତ୍ତି ନେଲେ । ହେଲେ ସେତେବେଳକୁ ତାଙ୍କୁ ମାତ୍ର ୧୭ ବର୍ଷ, ପରିବାର ସହ ବିଚାର ବିମର୍ଶ କଲାପରେ ନିଜ ଅଞ୍ଚଳରେ ଏକ ସାନିଟାରୀ ପ୍ୟାଡ଼୍ ଉତ୍ପାଦନ ୟୁନିଟ୍ ଖୋଲିବାର ନିଷ୍ପତ୍ତି ନେଲେ ।
ଏକ ନିମ୍ନ ମଧ୍ୟବିତ୍ତ ପରିବାରର ଝିଅ ପାୟଲଙ୍କ ପକ୍ଷେ କିନ୍ତୁ ଏତେଟା ସହଜ ନଥିଲା ସାନିଟାରୀ ପ୍ୟାଡ଼୍ ଉତ୍ପାଦନ ୟୁନିଟ୍ ଖୋଲିବା ଅର୍ଥାଭାବରୁ ନିଜ ବିଲରେ ଚାଷକାମ କରି ନିଜ ପରିବାରକୁ ସହଯୋଗ କରିବା ସହ ଏଥିରୁ ଉପାର୍ଜିତ ଅର୍ଥରେ ଯୁକ୍ତ ତିନି ଶିକ୍ଷା ସମାପ୍ତ କଲେ । ଏହାପରେ ଭାରତ ସରକାରଙ୍କ ଦକ୍ଷତା ବିକାଶ ପ୍ରଶିକ୍ଷଣ କାର୍ଯକ୍ରମରେ ଗ୍ରାମୀଣ ଆତ୍ମ ନିଯୁକ୍ତି ତାଲିମ୍ ନେଇ ସାନିଟାରୀ ପ୍ୟାଡ଼ ତିଆରି ଶିଖିଲେ । ଏହାପରେ ମୁମ୍ବାଇ ଯାଇ ନୂତନ ଜ୍ଞାନ କୌଷଳର କିପରି ଅଳ୍ପ ଖର୍ଚ୍ଚରେ ଉତ୍ତମ ଗୁଣବର୍ତ୍ତା ବିଶିଷ୍ଟ ସାନିଟାରୀ ପ୍ୟାଡ଼୍ ତିଆରି ବିଷୟରେ ଶିଖିଲେ । ଆଉ ତା ପରଠୁ ନିଜେ ସ୍ୱାବାଲମ୍ବୀ ହେବା ସହ ଆଖପାଖର ମହିଳା ମାନଙ୍କ ସହ ସେମାନଙ୍କ ପରିବାର ଲୋକଙ୍କୁ ସଚେତନ କରିବା ଥିଲା ତାଙ୍କଲକ୍ଷ୍ୟ । ରୁତୁସ୍ରାବ ଯେ ଏକ ଏକ ପ୍ରାକୃତିକ ପ୍ରକ୍ରିୟା , ଏଥିରେ ଛୁଆ ଅଛୁଆଁ ମନୋଭାବକୁ ବଦଳାଇବା ପାଇଁ ଲୋକଙ୍କୁ କରିଚାଲିଲେ ସଚେତନ । ଏହାସହ ରୁତୁସ୍ରାବ ସମୟରେ କପଡ଼ା କି ଅନ୍ୟ ଅପରିସ୍କାର ବସ୍ତୁ ବଦଳରେ ସାନିଟାରୀ ପ୍ୟାଡର ବ୍ୟବହାର ସମ୍ପର୍କରେ ବୁଝାଇଲେ ।
“ମୁଁ ମହିଳା ମାନଙ୍କୁ ବୁଝାଉଛି ରୁତୁସ୍ରାବ ଏକ ସାଧାରଣ ପ୍ରକ୍ରିୟା, ଏ ସମୟରେ ମହିଳାଟି ଅସୁଦ୍ଧ ହୋଇଯାଏନି ଯାହା ସାଧାରଣତଃ ଲୋକମାନେ ଭାବନ୍ତି । ମୁଁ ଛୋଟ ଛୋଟ ଗୋଷ୍ଠୀ ଓ ସ୍କୁଲ ମାନଙ୍କୁ ଯାଇ ମହିଳା ଓ ଝିଅମାନଙ୍କୁ ସାନିଟାରୀ ପ୍ୟାଡ ବ୍ୟବହାରର ଲାଭ ବିଷୟରେ ଅବଗତ କରାଉଛି । କପଡ଼ା କି ଅନ୍ୟ ପଦାର୍ଥ ବ୍ୟବହାର ନ କରିବାକୁ ଗାଁର ମହିଳା ଓ ଝିଅମାନଙ୍କୁ ପରାମର୍ଶ ଦେବାସହ ଏହା ଜମା ଏକ ଲାଜକଥା ନୁହେଁ ବୋଲି ବୁଝାଉଛି । ରୁତୁସ୍ରାବ ସମୟରେ ମହିଳା ମାନଙ୍କର ପରିଷ୍କାର ପରିଛନ୍ନତା ସହ ସେମାନଙ୍କର ଉପଯୁକ୍ତ ପୋଷଣ ସମ୍ବନ୍ଦରେ ସୁଚନା ଦିଏ ଓ ସେମାନଙ୍କୁ ଏମିତି କରିବାକୁ ଉତ୍ସାହିତ କରେ । ଆମ ଝାରସୁଗୁଡ଼ା ସହ ସମ୍ବଲପୁର,ରାୟଗଡ଼ା ଏବଂ କଳାହାଣ୍ଡି ଜିଲ୍ଲା ମାନଙ୍କରେ ଲୋକଙ୍କୁ ସଚେତନ କରାଉଛି ଓ ଅନୁକୁଳ ପ୍ରତିକ୍ରିୟା ମଧ୍ୟ ପାଉଛି” କୁହନ୍ତି ପାୟଲ ପଟେଲ ।
ମେଁ ୨୮, ୨୦୧୭ ରେ ଝାରସୁଗୁଡ଼ାର ବରପାନରେ ‘ପ୍ରଶାନ୍ତ ଏଣ୍ଟରପ୍ରାଇଜେସ୍‘ନାଁରେ ଏକ ସାନିଟାରୀ ପ୍ୟାଡ଼ ୟୁନିଟ୍ ଖୋଲିଲେ ପାୟଲ । ବ୍ୟାଙ୍କରୁ ଲୋନ ନେଇ ଖୋଲିଥିବା ଏ ୟୁନିଟ୍ରେ କେମିତି ଅଳ୍ପମୁଲ୍ୟରେ ମହିଳା ମାନଙ୍କୁ ସାନିଟାରୀ ପ୍ୟାଡ଼୍ ଯୋଗାଇ ଦେଇହେବ ତାକୁ ଦେଲେ ପ୍ରାମିକତା । ଫଳସ୍ୱରୁପ ମାତ୍ର ୨୫ ଟଙ୍କାରେ ୮ ଗୋଟି ପ୍ୟାଡ଼ ବିଶିଷ୍ଟ ସାନିଟାରୀ ପ୍ୟାଡ଼ ପ୍ୟାକେଟ୍ ପ୍ରସୃତ ସମ୍ଭବ ହେଲା । ଏହାକୁ ପାୟଲ ଆୟୋଜନ କରୁଥିବା ସଚେତନତା କାର୍ଯ୍ୟକ୍ରମ ମାନଙ୍କରେ ମହିଳା ମାନଙ୍କୁ ଯୋଗାଇ ଦିଅନ୍ତି ।
ସବୁଠାରୁ ଭଲକଥା ହେଲା “ପାୟଲ ପ୍ୟାଡ଼୍” ବ୍ରାଣ୍ଡ ନାଁରେ ନାମିତ ଏଇ ପ୍ୟାଡ଼୍ ଗୁ୍ଡ଼କ ବାୟୋ ଡ଼ିଗ୍ରେଡ଼େବଲକ୍ର୍ ମାନେ ଏହା ଅତି ସହଜରେ ମାଟିରେ ମିଶିଯାଇପାରିବ । ଏହାସହ ଅନ୍ୟଏକ ପ୍ରକାରର ପ୍ୟାଡ଼୍ ଯାହା ପୁନଃର୍ବାର ମଧ୍ୟ ବ୍ୟବହାର କରାଯାଇପାରିବ ତାହାମଧ୍ୟ ପ୍ରସୃତ କରୁଛି ପାୟଲ ପ୍ୟାଡ଼୍, ଏହାକୁ ୫ ବର୍ଷ ପର୍ଯ୍ୟନ୍ତ ପ୍ରାୟ ୨୦୦ ଥର ଧୁଆଯାଇ ବ୍ୟବହାର କରିହେବ । ଏହାକୁ ସ୍ଥାନୀୟ ତଥା ଆଖପାଖ ଅଞ୍ଚଳର ମହିଳା ମାନଙ୍କ ପାଖରେ ସୁଲଭ ମୁଲ୍ୟରେ ପହଞ୍ଚାଇବା ସହ ତାଙ୍କୁ ପ୍ୟାଡ୍ ବ୍ୟବହାର ଉପକାରିତା ସମ୍ପର୍କରେ ସଚେତନ କରାଇବାରେ ସଦା ତତ୍ପର ପାୟଲ । ନିଜେ ଆତ୍ମନିର୍ଭର ହେବାସହ ଆଖପାଖର ମହିଳାମାନଙ୍କୁ ମଧ୍ୟ ନିଜର ପ୍ୟାଡ଼୍ ୟୁନିଟରେ ନିଯୁକ୍ତି ଦେଇଛନ୍ତି ପାୟଲ । ଫଳରେ ଏବେ ସ୍ଥାନୀୟ ଅଞ୍ଚଳ ପାଇଁ ଆଦର୍ଶ ପାଟଲିଛନ୍ତି ପାୟଲ ପଟେଲ ।
“ମୋର ଲକ୍ଷ୍ୟ ଅମ ରାଜ୍ୟର ସବୁ ଜିଲ୍ଲାରେ ଏମିଡ଼ି ପ୍ୟାଡ଼୍ ଉତ୍ପାଦନ ୟୁନିଟ୍ ଖୋଲିବି ଆଉ ସଚେତନତାର ବାର୍ତ୍ତା ବାଣ୍ଟିବି । ଏହାଫଳରେ ମହିଳାମାନେ ସଚେତନ ହେବା ସହ ହୋଇପାରିବେ ଆତ୍ମନିର୍ଭର । ମୁଁ ଚାହୁଁଚି ଗାଁର ଅଧିକରୁ ଅଧିକ ମହିଳା ଓ ସ୍ୱୟଂସହାୟକ ଗୋଷ୍ଠିର ମହିଳାମାନେ ମୋ ସହ ଯୋଡ଼ିହୁଅନ୍ତୁ ଓ ନିଜ ଅଞ୍ଚଳର ମହିଳାମାନଙ୍କୁ ସଚେତନ କରାନ୍ତୁ । ଏହା ଏବେ ଆଉ ଏକ ଲାଜକଥା ହୋଇ ରହିନାହିଁ ମହିଳା ମାନଙ୍କ ମାସିକ ରୁତୁସ୍ରାବ ବିଷୟରେ ସେମାନେ ଖୋଲାଭାବରେ ଆଲୋଚନା କରିବା ଉଚିତ । ବିଶେଷକରି ଗାଁରେ ବସବାସ କରୁଥିବା ମହିଳାମାନେ ରୁତୁସ୍ରାବ ଜନିତ ସ୍ୱାସ୍ଥ୍ୟ ସମସ୍ୟାରୁ ମୁକ୍ତି ପାଇ ଏକ ସୁସ୍ଥ ଜୀବନ ବଞ୍ଚନ୍ତୁ” କୁହନ୍ତି ପାୟଲ ପଟେଲ ।
ଏ ସଫଳତାର ଏ ଯାତ୍ରାରେ ନିଜ ମାଙ୍କର ପ୍ରଛନ୍ନ ହାତ ଥିବା ପାୟଲ କୁହନ୍ତି । ନିଜର ନିଷ୍ଠାପର ଉଦ୍ୟମ ବଳରେ ମହିଳାମାନଙ୍କୁ ସଚେତନ କରାଇ ପାୟଲ ସମାଜରେ ଯେଉଁ ପରିବର୍ତ୍ତନ ଆଣିଛନ୍ତି ତାକୁ ସମ୍ମାନ ଜଣାଇ ତାଙ୍କୁ ୨୦୧୮ ମସିହାରେ ପ୍ରେରଣା ଆୱାର୍ଡ଼ ଓ ୨୦୧୯ ମସିହାରେ ଓଜସ୍ୱିନି ଆୱାର୍ଡ଼ରେ ସମ୍ମାନିତ କରାଯାଇଛି । ପାୟଲଙ୍କର ଏ ପ୍ରୟାସକୁ ଆମ ତରଫରୁ ଅନେକ ଅନେକ ସାଧୁବାଦ ।
